యూఎస్ సెక్స్ రాకెట్ పై స్పందించిన మెహ్రీన్

అమెరికాలో సెక్స్ రాకెట్ కుంభకోణం బయట ప్రపంచానికి పొక్కడం, ఆ వ్యవహారంలో నిర్మాత మొదుగుముడి కిషన్, ఆయన సతీమణి చంద్రకళ అరెస్ట్ కావడంతో టాలీవుడ్ పరిశ్రమ ఉలిక్కిపడింది. ఈ కుంభకోణంలో చాలా మంది సినీ తారల పేర్లు మీడియాలో కథనాల్లో వెలుగు చూశాయి. ఈ క్రమంలో యువ అందాల తార మెహ్రీన్ కౌర్ ఫిర్జాదా పేరు కూడా మీడియాలో ప్రచారమైంది. ఈ నేపథ్యంలో ఇటీవల స్పందించినట్టు వార్తలు వచ్చాయి. అంతేకాకుండా పలు విషయాలపై ట్విట్టర్‌లో స్వయంగా ఓ ప్రకటనను విడుదల చేసింది.
పంతం సినిమా ప్రమోషన్‌లో భాగంగా మెహ్రీన్ మాట్లాడుతూ. యూఎస్ సెక్స్ రాకెట్‌లోకి మీడియా నా పేరు లాగింది. కొన్ని మీడియా సంస్థలు నా గురించి ఏవేవో కథనాలు వెల్లడించాయి. మీడియా కథనాలతో నేను, నా కుటుంబం బాధపడాల్సి వచ్చింది అని అన్నారు. నేను ఎవరికీ ఇంటర్వ్యూ ఇవ్వలేదని స్పష్టం చేశారు.
ఇటీవల వచ్చిన మీడియా కథనాల్లో వాస్తవం లేదు. నేను ఎలాంటి ఇంటర్వ్యూ ఎవరకీ ఇవ్వలేదు. నాకు మీడియాతో మంచి సంబంధాలు ఉన్నాయి. వారు కూడా నాకు మంచి గౌరవాన్ని ఇస్తారు. వైరల్ ఫీవర్‌తో బాధపడుతూ ముంబైలో ఉండటం వల్ల పంతం ప్రమోషన్‌లో పాల్గొనలేకపోయాను అని మెహ్రీన్ ప్రకటనలో వెల్లడించింది.
సెక్స్ రాకెట్ వివాదం నేపథ్యంలో అమెరికాలో ఓ జరిగిన సంఘటన గురించి చెప్పాలనుకొంటున్నాను. విహార యాత్రలో భాగంగా నేను నా ఫ్యామిలీతో కలిసి వాంకోవర్ నుంచి లాస్ ఏంజెల్స్‌కు వెళ్తున్నాను. నన్ను సినీ తారగా గుర్తించి ఇమ్మిగ్రేషన్ అధికారులు విచారించారు. అమెరికాలో ఎందుకు పర్యటిస్తున్నావని అడిగి తెలుసుకొన్నారు. అప్పుడే అధికారులు సెక్స్ రాకెట్ గురించి నాకు చెప్పారు అని తెలిపారు.