राष्ट्रवादीचं आक्रमक गृहखातं अचानक डिफेन्सिव्ह; त्या घटनेनंतर बॅकफूटवर गेलं?

हा विषय सांगण्याचं निमित्त आहे गृहखातं भाजपबद्दल सॉफ्ट असल्याची उद्धव ठाकरे यांची नाराजी... अशी कोणतीही नाराजी नसल्याचं सांगण्यात आलंय खरं, पण काही गोष्टी आपल्या समोरच घडत असतात आणि त्या नजरेतून लपून राहणं कठीण असतं. उद्धव ठाकरेंच्या नेतृत्त्वात राष्ट्रवादी आणि काँग्रेसने जेव्हा सत्ता स्थापन केली, तेव्हा राष्ट्रवादीच्या ताब्यात असलेलं गृहखातं अत्यंत आक्रमक होतं. शरद पवारांनी स्वतः भीमा कोरेगाव प्रकरणात लक्ष घातलं. पण हे प्रकरण नंतर एनआयएकडे गेलं. यानंतरही राष्ट्रवादीकडे असलेलं गृहखातं एवढं आक्रमक होतं, की पोलिसांनी घरात घुसून संपादक अर्णव गोस्वामी यांना २०१८ मधील एका प्रकरणात अटक केली. ही अटक नोव्हेबर २०२० मध्ये झाली. उद्धव ठाकरेंचा एकेरी उल्लेख, सोनिया गांधींवर टीका यामुळे अर्णव गोस्वामी निशाण्यावर आले होते. पण या अटकेनंतर पुढे अशा काही घडामोडी घडल्या, ज्याने आक्रमक असलेल्या गृहखात्याला अचानक डिफेन्सिव्ह मोडमध्ये जावं लागलं. थेट कारवाई करण्याऐवजी स्वतःचाच बचाव करण्याची वेळ आली आणि सर्वात मोठी नामुष्की म्हणजे खुद्द गृहमंत्र्यांनाच राजीनामा देण्याचीही वेळ आली.