திருச்சியைத் திணறவைத்த.. கொள்ளையன் முருகனின் வெளிவராத உண்மைகள்!

Reporter - எஸ்.மகேஷ்
‘போலீஸுக்குத்தான் கொள்ளைக்காரன். சொந்த ஊர் மக்களுக்கோ பரோபகாரி...’ பல்வேறு கொள்ளைச் சம்பவங்களில் ஈடுபட்டாலும், ஊருக்குள் சில உதவிகளைச் செய்து ‘காட்ஃபாதர்’போலத் தன்னைக் காட்டிக்கொண்ட பிரபல கொள்ளையன் திருவாரூர் முருகனைப் பற்றி இப்படித்தான் சொல்ல வேண்டும். தான் கொள்ளையடித்து மறைத்துவைத்த பல திருட்டுப்பொருள்கள், நகைகள் எங்கேயிருக்கின்றன என்பதை யாருக்கும் சொல்லாமலேயே, அக்டோபர் 26-ம் தேதி பெங்களூரு அரசு மருத்துவமனையில் மரணமடைந்த முருகனின் வாழ்க்கை மிகவும் விசித்திரமானது. பல்வேறு ஆளுயர வாயிற்கதவுகளையும் காம்பவுண்டுகளையும் அநாயாசமாகத் தாண்டி, திருட்டில் ‘ஹை ஜம்ப்’ அடித்த முருகன், தன் கடைசிக் காலத்தில் நடக்க முடியாமல் சக்கர நாற்காலியும் படுக்கையுமாகத்தான் இருந்தான்.
வீடு... ஏ.டி.எம்... வங்கி... நகைக்கடை...
கர்நாடகா, ஆந்திரா, தெலங்கானா, கேரளா, தமிழகம் என ஐந்து மாநிலக் காவல்துறையினருக்கும் சிம்ம சொப்பனமாக இருந்த திருவாரூர் முருகனின் க்ரைமை மையப்படுத்தி, சில சினிமாக்களுக்குக் கதையே எழுதிவிடலாம். திருவாரூரில் சீராத்தோப்பு, பேபி டாக்கீஸ் ரோடுதான் முருகன் வசித்த ஏரியா. அந்தப் பகுதியில் பொருளாதாரத்தில் பின்தங்கிய தன் உறவினர்களுக்கு மாதந்தோறும் அரிசி, மளிகைப் பொருள்களை வாங்கிக் கொடுத்து வந்திருக்கிறான்.
சிறு வயதில் குடும்பத்தினரோடு சாலை போடும் பணியில் ஈடுபட்டுவந்த முருகன், அப்போதே வீடுகள் புகுந்து சின்ன அளவில் திருடத் தொடங்கியிருக் கிறான். 2005-ல் பெங்களூரில்தான் முருகன்மீது முதன்முதலாகத் திருட்டு வழக்கு பதிவாகியிருக்கிறது. அதன் பிறகு, ஐந்து மாநிலங்களில் அடுத்தடுத்து வழக்குகள் பதிவாகின. கடந்த 2008-ம் ஆண்டு திருவாரூரிலிருந்து சென்னை வந்த முருகன், பூந்தமல்லி, மதுரவாயல் பகுதிகளில் கொள்ளைச் சம்பவங்களில் ஈடுபட்டிருக்கிறான். குறுகியகாலத்தில் பெரிய ஆளாக மாற முடிவெடுத்தவன், அதன் பிறகு ஏடிஎம் மையங்களில் கொள்ளையடிக்கத் தொடங்கினான்.