ع اللى حاصل فِ الحواصل يا سلاملم يا سلام ( جلسة اصدقاء ) ... El Sheikh EMAM

كلمات أحمد فؤاد نجم
****
ع اللى حاصل
فِ الحواصل
يا سلاملم يا سلام
الكلام عايز إذاعة
والوطن عايز كلام
وإلإذاعة مستباحة
للمياعة في الغرام
والوطن آخر مجاعة
والجماعة فى انتخام
واللي يخشى إنه يمشي
جيم وريه ودال ولام
ينقح الكلمة الرصاصة
ع القصيدة و ع المقام
تدوي زي الرعد تدوش
تهتك التوب اللتام
ينكشف جسم الحقيقة
تظهر اللقمة الحرام

يا سلاملم يا سلام
والوطن عايز كلام
والإذاعة مستباعة
قول ياعم الشيخ إمام

ما احنا قلنا مـِ البداية
وانتوا شايفين الختام
حيث وإن الصالة بوظة
والحضور نيام نيام
والمجال فيه ألف قاضي
كل قاضي وله مَرام
والشهود نسيوا الشهادة
والقضية والنظام
والقفص مليان ضحايا
والهلالي لما قام
قلعوه روب المحامي
لبسوه توب الاتهام
والنيابة ع الغلابة
طبقت بند اللجام

يا سلاملم يا سلام
والوطن عايش آلام
وإلإذاعة مستباعة
قول يا عم الشيخ إمام

بينما والحالة نيلة
والبلد بالعة الفتيلة
والخواجة بألف حيلة
جاي يلغوص فى البِرام
يحكوا عن أسطي الفلاسفة
إنه أفتى ولا أفسى
فى القضية الهيكلية
وإن دي ما هوش منافسة
وأنت مالك يا أسطي فِلِس
جاى تحسس أو تلمس
الخواجة لما فلس
جاب دفاترينه القدام
دشدش الباترينةتبعه
شد شعره
وعض صابعه
انت ايه شأنك تتابعه
أما مخك مش تمام
شالوا هايكل جابوا عِلوه
كلهم في الهم بلوي
انت شوفلك سهرة حلوة
بكام إزازة وجوز حمام
وإحنا كاشفين الخواجة
وإللي جايبين الخواجة
واحنا عارفين كل حاجه
وأنت تتنيل تنام
ع الهيافه في الكلام
شوف يا عم الشيخ إمام
دي خلق فاضية
وعامله قاضية
وهي موضع لاتهام

بينما شهدانا لسه
دمهم أخضر ولسه
جرحهم في القلب لسه
بيواجِعنا لو ننام
وإن صحينا نلقى غابة
ضّبعِت فيها الديابة
والغلا كاوي الغلابة
ياسلاملم ياسلام
يحكوا عن واحد صاحبنا
كان أمين دايرة صاحبنا
والدواير قرع داير
ع الجميع قرن صاحبنا
نزل العداد وهاتك
واعلا وإنزل بجنيهاتك
خد مراتي وهات مراتك
كله ماشي يا عبسلام
وأما ريحه القرع فاحت
ع إللي باني وعاللي فاحت
والإشاعة جت وراحت
جابوا تفسير المنام
عابوا فنانة فِ زمانها
بعد ما الكَبّر غبنها
رحنا مصر وجينا بنها
وإحنا سارحين في الكلام
ع اللى حاصل فِ الحواصل
ياسلاملم ياسلام
مين يطيق الراحة واصل
والوطن عايش آلام

ياسلاملم ياسلام
والوطن عايش آلام
والإذاعة مستباعة
قول يا عم الشيخ إمام