قد ايه القلب يعشق لو سمع كلمة سلام ... El Sheikh EMAM

كلمات أحمد فؤاد نجم
***
قد إيه القلب يعشق
لو سمع غنوة سلام
ياسلام
قد إيه والغنوه تحلى
لو بدينا بالسلام ... ياسلام
قد إيه الروح تميل
والنغم يطلع جميل
والوتر يوصل كلامه
للقلوب صافي وأصيل
قد إيه ... وقد إيه
بس اقول إيه ولا إيه
السلام دا كلمه خضرا
زي أغصان الريحان
ترتوي منها الشفايف
لما ينطقها اللسان
زوقوكي الناس يادنيا
بالكلام عن السلام
والكلام غير الحقيقة
والعمل غير الكلام
ياسلام

من هنا نبدى الكلام
ياصبابه يامغرمين
كلنا نحب السلام
والسلام بيحب مين ؟
السلام بيحب نورا
وشوفوا نورا تبقى مين
نورا بنت عيونها خضرا
زي قلب العاشقين
والخدود ورديه خمري
والشفايف توت وتين
والضفاير .. تبر طاير
يبعت النور والرنين
والنهود حراس مدينه
بالبنادق سهرانين
يحرسوا قلب المدينه
من عيون البصاصين
والمدينه في عصر نورا
صوروها المنشدين
هي جنه إنسانيه
للبنيه وللبنين
فيها غيط القمح كافي
يدي كل المحتاجين
فيها نهر الحب وافي
يسقي كل العطشانين
فيها نور البدر صافي
يهدي كل الحيرانين
فيها مطرح للسلام
لو فرش يقدر ينام
فيها كل الناس
حبايب
فيها كل الناس تمام
ياسلام

قد إيه القلب يفرح
لو يزور بيتنا السلام
ييجي ومعاه الحبايب
نورا والنور والكلام
لافرش الأرض الحبيبة
حنه واعمل مشايات
وانصب الشادر يلالى
بالكهارب والزينات
واسقي كل الناس حبايبي
ميه وردي ف الكاسات
وادعي كل عيال حارتنا
بالمزاهر والنايات
ينشدوا الألحان فرايحي
تسري ف قلوب البنات
تعمل الأنغام عمايل
ترسم الأحلام حاجات
لو قالوها لامهاتهم
أو عادوها للخالات
يفهموها ويداروها
عن عيون الأبهات
ويقوموا لها ويقعدوا لها
ويغزلوا لها الأمنيات
والربيع يوصل مادام
ف الوجود نسمة سلام
والزهور تطرح جناين
والعبير يرسم حمام
زوقوكي الناس يادنيا
بالكلام عن السلام
والكلام غير الحقيقة
والعمل غير الكلام
ياسلام