هلي يا شمس البشاير ... El Sheikh EMAM

كلمات أحمد فؤاد نجم
***
هلى ياشمس البشاير
طابت وآن الأوان
طُلى وحِلى الستاير
نور الأشاير يبان
وارخى الضفاير مناير
فوق المكان والزمان
مصر الشباب العزيزة
قامت وكان اللى كان

مصر اللى خاضت ليالى
بحر الظلام الرهيب
تسهر عليها المبالى
تزعق ولا من طبيب
عرفت بلاها ودواها
بعيون شبابها النجيب
تسلم عيون الأطبا
ويعيش حكيم الزمان

قال الشباب المداوى
شقشق يانور الصباح
تظهر أصول البلاوى
تطهر عيون الجراح
يخضر عود الأغانى
يسرى العبير فِ البراح
تزرع فِ مصر الأمانى
زى النشيد والأذان

مصر العلوم والصنايع
والفلاحين والغيطان
مصر الجنود بالمدافع
متسلحين للميدان
مصر السلام بالمعارك
يفرش يغطي المكان
ينده ياشمس الحقيقة
طُلى عليكى الأمان
طُلى عليكى الأمان
طُلى عليكى الأمان