Babay Da Hukka.... میں بابے دا محرم حقہ

میں بابے دا محرم حقہ
میتھوں ججا قسم چوالے
میں بابے دا قاتل نئیں

میں بابے دا کلہا یا ر
جہڑابابا مرن دے ویلے بھکدا نئیں سی
جے اے ملزم بھکدا ہوندا
گڑ گڑ کرکے گلاں لاکے
اے بابے نوں مرن ناں دیندا

میں بابے دا محرم حقہ
میتھوں ججا قسم چوالے
میں بابے دا قاتل نئیں

سچ پچھیں تے
اس بابے نوں پہلی کھنگ اودوں آئی سی
جد بابے طیفے دی ماں نوں
نوہ دے ہتھ کٹیندا ڈٹھا

ہاں وے ججا
اس بابے دا پہلا اتھرو اودوں ڈگا
جد بابے دی بابی مر گئی

میں بابے دا محرم حقہ
میتھوں ججا قسم چوالے
میں بابے دا قاتل نئیں

تے سن ججا
اس بابے نوں پہلا دوراں اودوں ہویا
جد بابے دا مجی بستر
تے بابے دا نان پیالہ
وکھرا ہویا

میں بابے دا محرم حقہ
میتھوں ججا قسم چوالے
میں بابے دا قاتل نئیں

بابامارن والے قاتل
اونے جہڑے
اپنی کھیڈ کھلارن دے لئی
بھڈا بابا وکھرا کر کے
تیرے در تے آجاندے نیں

محمد صابر