الفول و اللحمة ... El Sheikh EMAM

كلمات أحمد فؤاد نجم
*****
عن موضوع الفول واللحمة
صرح مصدر قال مسئول
ان الطب اتقدم جدا
والدكتور محسن بيقول
ان الشعب المصري خصوصا
من مصلحته يقرش فول
حيث الفول المصري عموما
يجعل من بني ادم غول
والبروتين الكامن طيه
نادر زيه في ايها فول
تأكل فخده في ربع زكيبه
والدكتور محسن مسئول
يديك طاقة وقوة عجيبة
تسمن جدا تبقى مهول
لحمه نباتى ولا فول حاتى
تاكل قدره تعيش مسطول

ثم اضاف الدكتور محسن
ان اللحمه دي سم أكيد
بتزود أوجاع المعدة
وتعود على طولة الايد
وتنيم بني ادم
وتفرقع منه المواعيد
واللي بياكلوا اللحمة عموما
حيخشوا جهنم تأبيد

يادكتور محسن يامزقلط
يامصدر ياغير مسئول
حيث ان انتو عقول العالم
والعالم محتاج لعقول
مارأى جنابك وجنابهم
في واحد مجنون بيقول
احنا سيبونا نموت باللحمة
وانتو تعيشوا وتاكلوا الفول
مارأيك ياكابتن محسن
مش بالذمة كلام معقول