Ingorzlorom

In gorz lo rom, in gorz lanat

dann fon kivét mi dor bordé
lo kor lé maf, rod pa kapor
rom sek, rom sek, pi po bandé
in kar pikét rofé lo kor
mon vi baya, in zimantri
moman té bwar, papa té bwar
ala débwar dann vératri
trinn mon kadav ziska la gar
sinoi in sék, angrés karné
noiye mon misér din lamp koniak
la pa lomone mi kémandé
foutor bonér dann bourboniak
in famm la bit dann mon traka
zoli, zoli, in vré romans
m'la tir savat po in trwakar
moulouktanisé mon lésans
l'manzél la bar in swar livér
lodér viniass té pa komod
minn si l'palto té fé l'karnér
lamour in zour la pasé d'mod
lo kér, lo kor sék kom la tér
sé pa kala kél katakréz
dévir mon vi dopi dann bér
fé dor bénwa dann li la bréz
la vi lé ég mon vié rolan
i tourn, i vir dann la rouli
mwin pa soular pli k'mi prétan
zis gran malér po mélani
na d'swar mazine bondié lao
fé in nafér démar mon vi
pangar wa trouv sou filao
kiné atér mon makrotri
zanfan m'la fé mwin la pa vi
kitamér famm, larzan bragét
pa mwin ki bwar, sa mézami
rob an dantél po l'vyé gogét
tét mwin lé sou, san kompronans
mon kér la fand, makrél, gawé
vou lé byin roz dann mon souvnans
sinoi in sék dann vér-a-pié
m'la sey batay, sobat, sobaté
tir l'fyél dann pans, dann bouzaron
ek rom débat po débaté
don mwin l'pardon mon vyé moman
l'kor lé isé forstan kou d'konye
kouraz a tér parandsou l'kap
minn sat mi yimm mi gaign pa sonye
pri dann vomi dosi lablak
pran pa rogré po mon fanal
plér pa po mwin lor mwin tin blad
sa létryé mon kamarad
in gorz lo rom, in gorz lanat...