رئيس مصر: أول مناظرة رئاسية .. والفضل للمصريين

سيداتي آنساتي سادتي، اهلا ومرحبا بكم.. بدأ العد التنازلي وباقي من الزمن اقل من 45 دقيقة على الحدث اللي هيسجل في التاريخ كأول مناظرة رئاسية في تاريخ مصر والعالم العربي.. وبالتالي فوصف تاريخي اللي هيطلق على هذا الحدث من هنا ورايح ابدا مش من باب المبالغة وانما هو اسم على مسمى.. المكان: مصر المحروسة.. الزمان: يوم الخميس 10 مايو سنة 2012.. بعد مرور سنة وتلات شهور و15 يوم بالتمام بالكمال على أول ثورة شعبية صنعت بفخر في مصر.. دفع المصريين__ومازالوا_ بيدفعوا تمنها غالي اوي من دم قلبهم ومن نور عينيهم ومن زينة الشباب اللي زي الورد اللي فتح في يوم من ذات الايام في ميادين وشوارع مصر.. وحتماً هييجي اليوم اللي هيطرح فيه حلمهم حقيقة ان عاجلا أو آجلا.. لكن المؤكد ان النهاردة الفضل ليهم ولولاهم ما كنا عشنا ولا شفنا هذا الكم من الايام اللي صنعنا فيها التاريخ او اعادنا كتابته مرة تانية.. وبالتالي لا عشنا ولا كنا لو يوم رضينا بقليلنا.. ولا عشنا ولا كنا لو يوم نسينا او فرطنا..