بلدنا بالمصري: الجيزاوي .. من يوقف مسلسل إهانة المصريين

نروح بقة لآخر أخبار بلدنا، وهنبدأها باخر تطورات الانتهاك السافر لكل حقوق الانسان وآخر حلقة حتى الان في مسلسل اهانة المصريين في الخارج _لان زي ما احنا عارفين عزيز اهله عزيز على غيره والعكس بالعكس_ الضحية المرة ديه، هو المحامي الشاب احمد الجيزاوي، كل تهمته انه من ضمن المحامين اللي بيدافعوا عن المصريين المعتقلين والمحتجزين في السجون السعودية بدون اسباب معلومة وفي ظروف غامضة ومش مفهومة، فتم اعتقاله هو كمان على ابواب السعودية وهو داخل يعمل عمرة بتهمة "العيب في الذات الملكية" وجزاءها سنة سجن و20 جلدة في انتظاره يوم الجمعة اللي جاية لو ما اتحركناش جميعا حكومة وشعب وساعتها لا ملامة على اي حد غيرنا خاصة ان الموضوع وبعد اسبوع من اعتقاله دخل في متاهات من نوع الترامادول والزاناكس وعجبي.