بلدنا بالمصري: الكتاتني رئيساً لتأسيسية كتابة الدستور

يسعد مساكم وحلقة جديدة من بلدنا بالمصري.. حلقة يوم الاربع 28 مارس 2012 الموافق أول اجتماع لأول جمعية تأسيسية لصياغة أول دستور بعد أول ثورة شعبية بمعنى كلمة في مصر.. شئنا أم أبينا، اتفقنا او اختلفنا، المؤكد ان تاريخ النهاردة هيفضل محفور في سجل التاريخ المصري ليوم الدين، أما اللي مش مؤكد فهو طبيعة الحروف اللي هيتكتب بيها هتكون من نور ولا هيكون لها طبيعة تانية.. وعلى حسب برده مين اللي هيكتب التاريخ!!!

لكن على اي حال مش متاكدة ان التاريخ هيكتب ان جلسة مجلس الشعب اتاخرت عن معادها لتاخر رئيس مجلس الشعب عن الحضور في المعاد لانشغاله في اعمال اول جلسة من جلسات الجمعية التاسيسية لكتابة الدستور قبل ما ينتخب رئيسها ب71 صوت من اصل 72.. يعني الدكتور سعد الكتاتني هو حاليا أول رئيس لمجلس الشعب بعد الثورة ورئيس اول جمعية تاسيسية لكتابة أول دستور بعد الثورة، وواحد من الاسماء المطروحة للترشح لأول انتخابات رئاسية بعد الثورة عن جماعة الاخوان المسلمين ان قررت التراجع عن قرارها وقررت تشارك في المنافسة على كرسي الرئيس.