بلدنا بالمصري: قضية فساد كل دقيقتين

قبل الثورة كان الفساد للركب وبعد الثورة اكتشفنا إنه كان من الساس للراس ومازال.. قبل الثورة كان فيه قضية فساد مالي أو إداري كل دقيقتين، وبعد الثورة احنا لسة زي ما احنا محلك سر: قضية فساد مالي وإداري في المصالح والهيئات الحكومية كل دقيقتين.. دة مش كلامنا، ديه النتيجة اللي وصل لها تقرير صادر عن هيئة الرقابة الإدارية.. وعشان بس اللي ممكن يكونوا بيقولوا دلوقتي في عقل بالهم: " يبقى احنا خادنا إيه من الثورة"؟!!! الثورة ما حكمتش عشان تتحمل مسؤولية القضاء على الفساد من عدمه لكن المؤكد إن القضاء على الفساد وعلى القيادات الفاسدة وعلى التشريعات الفاسدة وعلى أي قشاية فاسدة معششة في أي خرم إبرة في بلدنا هو مطلب أساسي من مطالب الثورة وحتى من المطالب اللي بيتقال عليها "فئوية"!!! بس يا هنا من يسمعنا!!!