من الناس: الكذب في حياتنا 1/2

من الواضح ان الناس زمان كانوا حاسين الكذب قليل بينهم، علشان كده عملوا شهر في السنه الناس تكذب فيه كذبه واحده وسموها كذبة أبريل .. أما دلوقتي والسنة كلها بقت أبريل، وبقى كله بيكذب على كله طول الوقت .. والكذب مبقاش بس ان الواحد يكذب على مراته، أو على مديره، أو زبون .. لكنه تجاوز كل ده .. تصريحات الوزراء الوردية عن فرص العمل والشباب بيعاني من البطالة أو عن النمو الاقتصادي وناس كثير مش لاقيه تاكل .. كلها كذب، انضمام المرشحين المستقلين للحزب الوطني أو غيره بعد فوزهم في الانتخابات .. ده كذب، ولما لحكومات والمسئولين ونواب الشعب بيكذبوا، يبقى عايزين ايه من المواطنين؟
هل الكذب فعلاً بقى منتشر بيننا بشكل مرضي؟ وهل الناس بقت بتعتمد عليه في حياتها اليومية؟ امتى بتلجأوا للكذب؟ وايه الظروف أو المواقف اللي بتجبركوا تكذبوا؟