Fotoapparat bilan suratga olish joizmi? - Shayx Obid qori

Savol: Men ishdan keyin to'y bo'layotgan joylarda suratga olib, qo'shimcha daromad qilaman. Shu ishim shariatda joizmi yo'qmi? Shavkat. Javob: Ma'lumki, qo'l bilan surat chizish Islom dinida taqiqlangan. Ammo fotoapparat bilan suratga tushirish keyingi zamonlarda paydo bo'lgan yangi masalalardan bo'lgani sababli bu mazmunda turli fatvolar mavjud. Mazkur fatvolarning xulosasi shuni ifodalaydiki, fotoapparat bilan jonli narsalarni suratga tushirish faqat zarurat uchungina joiz. Agar zarurat bo'lmasa, jonli narsalarni suratga tushirish mumkin emas. Zarurat deganda nima tushuniladi? Pasport olish yoki shaxsni tasdiqlash uchun yo esa biror jinoyatchini topish uchun suratga ehtiyoj tug'iladi. Shu kabi holatlarda surat olishga ruxsat etiladi. Rasululloh solllallohu alayhi va sallam surat chizuvchilar haqida juda qattiq ogohlantirishlar berganlar. Bu ogohlantirish qo'l bilan surat chizuvchilar haqida bo'lgan esa-da, Islom olimlari fotosurat ishlash ham shu hukmga doxil bo'lishini aytishgan. Rasululloh sollallohu alayhi va sallam dedilar: “Bu suratlarning egalari azoblanadilar. Ulardan: “O'zingiz yaratgan narsangizni tiriltiring!” deb talab qilinadi. Suratlar bor uyga farishtalar kirmaydilar”. (Muslim rivoyatlari). Ammo jonsiz narsalarning suratini qo'l bilan chizish yoki fotoapparat bilan tasvirga tushirishda hech qanday mone'lik yo'q.