حي المدامع والابتسام | مسحراتي المدار

#المدار #مسحراتي #فؤاد_حداد


شعر: فؤاد حداد
إلقاء: وائل فتحي
القصيدة كاملة
اصحى يا نايم وحّد الدايم
وقول نويت بكره ان حييت
الشهر صايم والفجر قايم
اصحى يا نايم وحّد الرزاق
رمضان كريم
مســحـراتى
مـنـقـراتى
أجمل سلام
على كل ناحيه
ألاقيها صاحيه
وعلى الحسين
والسيده
والمادنتين
فى الحى دا
سلام وذكرى
لشيوخ بتقرا
أدى الهدايه
من البدايه
وللختام
والكل سامع
حى المدامع
والابتسام
رمضان بيفتح
باب الكرام
دخلت أمدح
زين الانام
على ربابي
ولقيت شبابي
رمى التحيه
المستحية
وفات قوام
كان نور صغير
يحلم يغير
كل الظلام
ويادرس شيخنا
وريحة تاريخنا
جار المقام
الستر مخمل
والمسك أكمل
رؤيا المنام
ونور خيالي
غنى الليالي
من ألف عام
والمشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
أدق كل البيبان لا تنهروا السائل
تارك لقلبى العنان فى الحب مش عاقل
على أرض مصر بحنان وعلى الأثر ناقل
أمشى ولا يمشى معاى الكبر
حبيت على أرض الوطن كل شبر
كان بالدهب والتبر يتاقل
اصـحى يا نايم وحّد الدايم
السعىُ للصوم خيرٌ من النوم
دى ليالى سمحه نجومها سبحه
اصـحى يا نايم.. يا نايم اصحى
وحّد الرزاق
تابعوا قناتنا علي اليوتيوب من هنا .. https://bit.ly/39eP5wY
تابعونا علي الفيس بوك من هنا .. https://www.facebook.com/elmadartv
تابعونا علي تويتر من هنا.. https://twitter.com/elmadartv
تابعونا على إنستجرام من هنا.. https://www.instagram.com/elmadartv/