GARHWALI POEM BY PRADEEP SINGH RAWAT KHUDED ❝उठणू बैठणू बी छोडेल❞

जरूर सुनिये प्रदीप रावत खुदेड़ की ये कविता

❝उठणू बैठणू बी छोडेल❞

तिन सौ-समाज मा उठणू बैठणू बी छोडेल
हमारि गलत्यू पर हमतैं डंटणू बी छोडेल

गौं- मौ तै तिरे कि क्या पाण तिन बोल त सै
जू तिन अब गौंमा पैणू-पातू बंटणू बी छोडेल

आजकल त तू ग्वेर बी एखुली एखुली बणगे
तिन त अब हमारु दगड़ू रखणू बी छोडेल

इकुलांस बेटि-ब्वारयूं तै सारू मिल जांदू छौ
अब त तिन रात मा खँसणू बी छोड़ेल

त्यरा हिटयां बाटों नया लगलोन पैटण छौ
पर तिन त अब नया बाटों हिटणू बी छोडेल

कन नि पढ़दू क्वी कविता जू तू भलु लेखदी
पर तिन त बिंब अलंकार रंचणू बी छोडेल

प्रदीप रावत ❝खुदेड़❞