Anghjula Potentini - Lettera à Fratellu

Festa di A Nazione
Chjesa San Carlu in Bastia

LETTERA À FRATELLU

Ti scrivu à tè, fratellu paisanu
Per ditti quantu hè tristu lu me core,
Ti manda assai suspiri è ti porgu la manu
Ma dammi torna tù un segnu d'amore
Voltati versu mè, t'aspettu, à lu veranu
Ùn lascià più, fratellu, u tempu corre
Avvicinati à mè, ùn stà luntanu

Ùn dormu più tranquillu è spenseratu
Quandu si chjode a porta di a prigiò
Digià fratellu nostru hè imprigiunatu
Per avè solu dettu è cun ragiò:
"Vogliu stà in terra corsa, inde sò natu
È per fà piazza à l'altri ùn mi ne vò
Chì vive è more corsu, mi sò ghjuratu!"

Avveniti a dulcezza di a nostra mamma
È lu so core sempre in alegria
Oghje di tanti strazi ella si lagna
Elli dicenu: "Amme è cusi sia!"
Tù ùn poi lascialla more cum'è una cagna
Falla per cumpassione, torna una cria
Chì per l'ultima volta ella ti chjama

Ma s'è t'ùn faci prumessa. è quì ùn ritorni
Ùn sunerá chè dolu u campanone
Ùn viderai mai più fumà i forni
A panca serà nuda, spintu u fucone
Truverai strangeri in li cuntorni
È senza fiori in manu ma lu bastone
Pensu ch'è averai capitu i me frastorni

Ghjuliu Bernardini