مصري أوي | مولد الحسين .. راحة المريدين والناس الشقيانين

بسم الله، إقرأ الفاتحة في سيدنا الحسين وصل على النبي، دين العشق مالوش مذهب، وده حال أهل المولد، جايين من الشرق ومن الغرب، سمر وبيض، لأجل المولد والليلة الكبيرة.
المولد حاله روحانية فيها الزحام براح والدوشة تسبيح والغنا سرحان في ملكوت الله..
المولد مش لمة والسلام، المولد كيف المورديين والغلابة الشقيانين يروحوا عند المقام، يقولوا الكلام اللي في القلب على حبة أحلام وأمانى، المولد زحمة خلق كتير وشوشهم صافية وقلوبهم حيرانة، المولد دراويش وأطفال متزوقين، المولد بلالين وبخور وعيون قاصدة الرضا والراحة.
بسم الله، إقرأ الفاتحة في سيدنا الحسين وصل على النبي، جملة هتسمعها تتردد حواليك وسط أجواء همهمه وتسابيح وابتهالات في حب الله، المولد رجاء وحب وكباية شاي وعود ورق وطبلة وأنوار وهيصة وسبحة خضراء وناس بتنادي على طفل شريد.
المولد حسنة يا ست حسنة يا سيدنا، المولد جلابية بيضة وعباية سودة وطفل صغير فرحان بالنور.
المولد، الأمل بالوعود والدعاء للموجود والناس الطيبين بعيون سرحانين، وذكر يقول مدد يا سيدنا الحسين مدد.
▶https://www.facebook.com/itfarragofficial
▶https://plus.google.com/+Itfarrag
▶https://twitter.com/itfarrag
▶http://www.itfarrag.com