【廢評之後...】《全民造星》評判質疑參賽者演出 蕭定一被「鳩嗚」華Dee KO

ViuTV《Good Night Show 全民造星》上星期搵咗合作夥伴HMV數碼中國集團五位代表包括主席蕭定一、歌手鄧健泓、導演吳漢邦、演員張建聲同趙永洪擔任星級評判，點知佢哋畀嘅評語就畀網民鬧爆「廢評」。
好似參賽者表演完後，蕭定一問：「你覺唔覺得Oscar呢個名比較普通？」而吳漢邦亦寸爆︰「啲帽點解要掟？」搞到多位導師卓韻芝狂寸佢哋hea，而劉美君更加㷫到爆seed：「頂你個肺！」然後再衝到台前同評判對質。(相關新聞: )
喺今晚同聽晚兩集，又係同一班評判，今次冇乜廢評，但評判彈參賽者嘅評語，全部畀參賽者反駁，搞到蕭定一要繼續死撐。今次係楊樂文（Lokman）嘅B3組對老友「鳩鳴劉華」何啟華（阿Dee）嘅B4組，兩隊演出完指定歌之後，分別表演自選項目，阿Dee一隊做喜劇，Lokman一隊唱歌同跳舞，結果Lokman一隊勝出。
賽後評判蕭定一同吳漢邦多番質疑阿Dee，但就畀阿Dee全部KO。
蕭定一問阿Dee:「我哋工業好需要大膽同勇氣，但呢個大膽同勇氣都好需要教導。其實我想問你哋決定做呢個drama嘅時候有冇導師誘導你哋？」
阿Dee話5個導師都有教:「我哋都有問好多人唔同意見究竟個message個核心最後係喺邊個方位度走出嚟，然而最後我哋係揀咗呢一個，綜合咗咁多意見，亦都係...」另一評判吳漢邦就插口批評話:「咁咪錯！」阿Dee問評判錯喺邊，吳漢邦就問劇本邊個寫，知道係阿Dee寫之後就話:「你先至係核心吖嘛，個message係喺你度吖嘛，你問人意見做乜啫？」吳漢邦啲態度差到令人反感。
阿Dee責怪話自己創作經驗唔夠問題。但呢個時候另一評判張建聲就幫阿Dee口話:「我唔係咁睇喎，我真係中意喎。創作劇本係好難，你仲要一個人孭埋主角咁滯，則邊仲係要唱開歌，仲要演埋戲，呢樣係好難做嘅事，所以我係再三respect你呢次創作。」跟住張建聲指住吳漢邦大聲鬧話:「我係同你敵對嘅。」