Report TV - Kukës, pallati drejt shembjes 12 familje në rrezik për jetën

KUKËS-Banorët e pallatit numër 14 në lagjen 1 në qytetit e Kukësit, po jetojnë me frikën e shembjes së pallatit katër katësh, ku aktualisht më të rrezikuara janë 12 familje.

I ndërtuar mbi 40 vite më parë, ky pallat sot ka humbur plotësisht qëndrueshmërinë , ndërsa amortizimi i godinës vihet re në shumë pjesë të tij.

Sikur të mos mjaftojë rrënimi që ka ky pallat edhe kabllot elektrike si rrjeta merimangash janë rrezik më vete.

Banorët e këtij pallati pohojnë se situata është kritike dhe apeli i tyre është për ndërhyrje sa më parë nga ana e shtetit, pasi ata vet e kanë të pamundur ta bëjnë për shkak të gjendjes së vështirë ekonomike.

Ndërkohë e njëjta situate paraqitet edhe në pallatet e tjera në këtë lagje ku rënia e fasadave është kthyer në një fenomen të përditshëm duke rrezikuar jo pak jetën e banorëve dhe fëmijëve.