كل ليل له فجر الا ليله هوه ... El Sheikh EMAM

كل ليل له فجر الّا ليله هو
في ما بين الاتنين خصومه وتار وهوّه
يا غريب الدار مسيرك تنهي ليلك
مستحيل تقدر تحوش الفجر قوّه
مهما طال ليلك حيطلع صبح تاني
والندى ح يبلّ رصفان المواني
والطيور تهزج مواويلك أغاني
غنوتين للبلبلين والإمري غنوة
في باريس البرج قوم اكتب في ظلّه
شعر للشّعب اللّي طول عمرك تجلّه
اللي ذلّ غزاه وما قدرت تذله
داس طغاه وغزاه وعاش استنى هو
الحديد والنّار ما يتنوش الرجولة
يعمل ايه البغى للنفس المهولة
يللّي شعرك يتنسج فدو وبطوله
الميدان واحد وبرا زيّ جوّا
بكره ترجع تاني للأرض الحبيبة
تطفي نار الوحدة والغربة الكئيبة
مهما شفت ومرّ بك أوقات عصيبة
برضو عزمك زيّ ماهو هو هو
بكره تيجي تلتقي فلّاح بلدنا
فيك مصيره وصوت ضميره وصوت بلادنا
بكره ورد الأرض يملا ايدين ولادنا
يبقى زهر القطن غنوة وزاد وكسوة
ابن مصر ارادته ما تهونش للخواجة
خوف بطالة وجوع وبؤس وذل حاجة
واللّي يملك روحه يملك كل حاجة
تلتقيه مارد صنع م الضّعف هو
انت ثورة شعب ما تخمدش نارها
انت نهضة أمّة مفروض انتصارها
مهما طل يوم انتظارك وانتظارها
جاي لقلبك يوم حياخذه حضن حوّا