سلام للنونو

يلا تعالى لدنيتنا
وبنورك نور بيتنا
تلبس دح وتتبحبح
تاكل الممبه وتقول بح
تعلب معنا وتتمرجح
واسبوعك ده يوم عيدنا
يلا يلا يلا
يلا تعالى لدنيتنا
لا متشكر كتّر خيركم
أنا مستغني عن دنيتكم
وأنا جنين عايش مرتاح
لو جيت راح أتعب بينكم
طيب ليه في أيه جرى أيه؟!
يا ترى في أيه مخبيه؟!
إنْ كان سر تعالى احكيه
ريّحنا وقولينا عليه

بابا بيصحى من نومه
متأخر يكوي هدومه
عاوز يفطر علشان ينزل
على شغله ويبدأ يومه
لكن ماما راحت في النوم
ما هي تعابه طول اليوم
تكنس تمسح تغسل تطبخ
من بس إلا عليه اللوم؟!
كان فيها أيه لو يتفاهموا مع بعضيهم بمحبه؟!
مش يتخانقوا ويتخصموا؟!
(والحبة تصبح قبة)
أبقى أنا غلطان؟!
(طبعاً لأ)
بس أنا زعلان!!
(عندك حق)

ماما عاوزة تجيب فستان
آخر موضة شكله جنان
إن قال لها الشهر الجاي
تحكي وتشكي للجيران
طيب ليه كشف المستور؟!
مش يمكن بابا معذور؟!
بين مصاريف البيت والميه
والإيجار وكمان النور
كان فيها أيه لو يتفاهموا مع بعضيهم بمحبه؟!
مش يتخانقوا ويتخصموا؟!
(والحبة تصبح قبة)
أبقى أنا غلطان؟!
(طبعاً لأ)
بس أنا زعلان!!
(عندك حق)


ماما تقول هنسمي النونو
على اسم الرحوم جده
كان راجل مالو هدومه
ويا رب يصبح قده
يصرخ بابا ويقول ليه
ابني وأنا حر أسميه
على اسم كبير العيلة
إن شاء الله يا رب يخليه
كان فيها أيه لو يتفاهموا مع بعضيهم بمحبه؟!
مش يتخانقوا ويتخصموا؟!
(والحبة تصبح قبة)
أبقى أنا غلطان؟!
(طبعاً لأ)
بس أنا زعلان!!
(عندك حق)
==========
طيب وسماح وتوبة
وعد تكون آخر نوبة
يلا تعالى وشرفنا
دي الحفلة هنا منصوبة
يلا يلا يلا تعالى
النونو النونو النونو