یہ معجزہ بھی محبت کبھی دکھائے مجھے - قتیل شفائی

یہ معجزہ بھی محبت کبھی دکھائے مجھے
کہ سنگ تجھ پہ گرے اور زخم آئے مجھے

میں اپنے پاؤں تلے روندتا ہوں سائے کو
بدن مرا ہی سہی، دوپہر نہ بھائے مجھے

برنگِ عود ملے گی اسے مری خوشبو
وہ جب بھی چاہے بڑے شوق سے جلائے مجھے

میں گھر سے تیری تمنا پہن کے جب نکلوں
برہنہ شہر میں ‌کوئی نظر نہ آئے مجھے

وہی تو سب سے زیادہ ہے نکتہ چیں میرا
جو مسکرا کے ہمیشہ گلے لگائے مجھے

میں اپنے دل سے نکالوں خیال کس کس کا
جو تو نہیں تو کوئی اور یاد آئے مجھے

زمانہ درد کے صحرا تک آج لے آیا
گزار کر تری زلفوں کے سائے سائے مجھے

وہ میرا دوست ہے سارے جہاں‌کو ہے معلوم
دغا کرے وہ کسی سے تو شرم آئے مجھے

وہ مہرباں ہے تو اقرار کیوں نہیں کرتا
وہ بدگماں ہے تو سو بار آزمائے مجھے

میں اپنی ذات میں نیلام ہو رہا ہوں قتیل
غمِ حیات سے کہہ دو خرید لائے مجھے


Yeh Mojaza Bhi Muhabbat Kabhi Dikhaye Mujhay
Kah Sang Tujh Pah Giray Aur Zakhm Aaye Mujhay

Main Apnay Paaoun Talay Rondta Houn Saaye KO
Badan Mera Hi Sahi, Do pehar Nah Bhaaye Mujhay

Barang-e-Auod Milay Gi Usay Meri Khushboo
Woh Jab Bhi Chahay Baray Shauq Say Jalaye Mujhay

Main Ghar Say Teri Tamana Pehan K Jab Nikloun
Barhana Shehar Main Koi Nazar Nah Aaye Mujhay

Wohi To Sab Say Zyada Nukta Cheen Hay Mera
Jo Muskara K Hamesha Galay Lagaye Mujhay

Main Apnay Dil Say Nikaloun Khyal Kis Kis Ka
Jo To Nahein To Koi Aur Yaad Aye Mujhay

Zamana Dard K Sehra Tak Aaj Lay Aaya
Guzar Kar Teri Zulfoun K Saaye Saaye Mujhay

Woh Mera Dost Hay Saaray Jahan Ko Hay Maaloom
Dagha Karay Woh Kisi Say To Sharam Aaye Mujhay

Woh Meharbaan Hay To Iqraar Kuin Nahi Karta
Woh Bad Gumaan Hay To Soo Baar Aazmaye Mujhay

Main Apni Zaat Main Nailaam Ho Raha Houn Qateel
Gham-e-Hayat Say Kah Do Khareed Laye Mujhay